Engkisuk, Sabtu tanggal 15 Februari, ring SD Model Sobo,
arep dianakaken pelatihan nulis dongeng lan cerito cendhek dienggo guru-guru
pengajar Boso Osing sak kabupaten Banyuwangi.
Saben kecamatan
liwat UPTD (Unit Pelaksana Teknis Daerah) olih ngirimaken papat utusan. Ring
Kabupaten Banyuwangi ono 24 kecamatan. Kadhung sak UPTD akhire mung biso ngirim
3 utusan, totale ono 72 uwong.
Pelatihan iki
saktemene, yo duduk hang kawitan. Sedurunge, isun yo tau nganakaken tanggal 7
Desember 2013, ring Universitas 17 Agustus (UNTAG). Kolo semono, instrukture
ono Ibu Oktavia Vidiyanti (teko Balai Bahasa Jawa Timur) bab cerito cendhek,
lan Pak Hasan Basri (guru SMPN 1 Banyuwangi) bab boso Osinge.
Cumo bedane hang
ring UNTAG dienggo umum, sopo bain biso teko, hang saiki dienggo guru-guru Boso
Osing.
Kang sun karepaken,
mugo-mugo guru-guru hang teko kesuk, nduweni angen-angen hang podo ambi isun.
Pelatihan iki mung wadhah latihan. Ring pethitane, ono impen hang lebih gedhi,
yoiku nguri-uri boso Osing. Mugo-mugo hang teko, biso temenanan manpaataken
wektune dienggo ngangsu kaweruh bab nulis, khususe dongeng lan cerito cendhek.
Hing mergo ngejer sertifikat hang wis
ditandatangani PLT Dinas Pendidikan Drs. Dwi Yanto, lan biso dadi ongko kredit
kenaikan pangkat beloko.
Panggonane
guru-guru iki seru pentinge. Ibarate perang, guru-guru iki komendan lapangan
hang berak-berak ngewani tondo, kapan nyerang, kapan mundur. Ring tangane
guru-guru iki, akeh murid-murid sekolah hang dadi arepane wong kabeh dienggo
mbangun kekuatane boso Osing mbisuk, makene tambah sagah. Lan guru-guru iki mau biso
dadi sengkere kemajuan boso Osing.
Kadhung wis hing ono pelajaran
boso Osing ring sekolahan, ilange boso Osing ring dunyo iki tambah akas dalane.
Ilange boso Osing, hang diantem yo budoyone pisan. Kelendi arep nguri-uri
Seblang, kelendi arep nguri-uri Gandrung kadhung bosone wis hing ono. Ngarteni Gandrung, kudu
ngarteni paran syair-syaire.
Njagani makene boso
Osing biso terus lestari iki, biso diwujudaken ring macem-macem kegiatan.
Contone, diakehi
buku-buku, sastra, seni, majalah, laporan, koran hang terbit nganggo boso Osing. Gunane, enggone lalare sekolah,
buku-buku lan wacanan liyane iki biso dadi tambahan wacanan. Paran teori hang diajaraken ring
sekolahan, ditemoni prakteke ring buku-buku iki. Sastra Osing makene tambah
merujuk gedhi.
Sak liyane olih
pelatihan, guru-guru iki mau diarepaken nulis dhewek dongeng utowo cerito
cendhek hang sak mareke arep didadekaken buku. Bukune engko disebar nyang
sekolah-sekolah.
Ilmu hang wis dingarteni teko
pelatihan iki, diarepakan hing mandheg nung gurune. Guru biso nulari muride
carane nggawe dongeng hang apik, nulis cerito cendhek hang enak.
Liyo dino,
murid-muride iki biso pisan milu nulis cerito cendhek, tah dongeng, lan kadhung
akeh hang apik, isun yo gelem nerbitaken karya-karya lalare SD Banyuwangi dadi
buku. Makene lalare tambah giras, tambah koyo dipecut, milu nggedhekaken hang
aran boso Osing.
Pelatihan kesuk
iku, instrukture ono Kang MH Qowim, redaktur Radar Banyuwangi, sarjana sastra
lulusan Universitas Udayana, ngurusi bab cerito cendhek, ono Kang Ju teko KKG
Kelompok Kerja Guru Singojuruh, ono Kang Hasan Basri hang ngurusi bab dongeng,
lan Mbok Hani Z. Noor hang repot dadi seksi kerepotan, ngurusi sembarang
kalire. Kegiatan pelatihan iki yo
dibantu ambi wong-wong teko Dinas Pendidikan.
Saktemene, pelatihan koyo gedigi tapi dienggo
wong umum yo ono pisan hang kepingin maning dianakaken. Dadi yo antenono bain
liyo dino.
(iwandear@gmail.com)
Tidak ada komentar:
Posting Komentar